Фотолавҳа Archives - Page 2 of 3 - Самарқанд вилоят маъмурий суди

Коррупцияга қарши курашиш фаолиятини самарали ташкил этиш давр талаби

Ўзбекистон Республикаси Президентининг 2021 йил 6 июлдаги “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги ПФ-6257-сонли фармони ҳамда ”Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида”ги ПҚ-5177-сонли қарори мазмун моҳиятини тушунтириш мақсадида тадбир бўлиб ўтди.

Самарқанд вилоят маъмурий судининг судьяси С.Ю.Солиев ўз маърузасида бугун халқимиз ўз олдига эзгу ва улуғ максадлар қўйганлиги, тинч ва осойишта ҳаёт кечираётган, аввало, ўз кучи ва имкониятларига таяниб, демократик давлат ва фуқаролик жамияти қуриш йўлида улкан натижаларни қўлга киритаётган бир замонда, тинч ва осуда ҳаётимизга, хавфсизлигимизга таҳдид солаётган уюшган жиноятчилик ва коррупциянинг салбий таъсири ҳақида тўхталиб ўтди.

Шу билан бирга, юртбошимиз Ш.М.Мирзиёев бошчилигида мамлакатда ҳуқуқий давлат ва кучли фуқаролик жамияти қуришнинг умумий стратегиясини амалга ошириш доирасида қонун устуворлигини таъминлаш, фуқароларнинг ҳуқуқ ва эркинликларини ҳимоя қилиш, суд-ҳуқуқ тизимини такомиллаштириш, шунингдек, Ўзбекистон Республикаси тараққиётида асосий хавф, иллат сифатида қораланаётган коррупцияни олдини олиш борасида ўтказилаётган ислоҳотлар ўз самарасини бераётгани, халқимиз орасида жиноятни жазолашдан кўра, уни олдини олиш, бу борада тегишли профилактик чора-тадбирлар кўриш афзалроқдир деган тушунча шаклланиб бораётганлиги таъкидланди.

Йиғилишда, Ўзбекистон Республикаси Президентининг 2021 йил
6 июлдаги “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги ПФ-6257-сонли фармони ҳамда Ўзбекистон Республикаси Президентининг 2021 йил 6 июлдаги “Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида”ги ПҚ-5177-сонли қарори мазмун-моҳияти таништирилиб, ҳукуматимиз томонидан коррупцияга қарши курашиш ва уни олдини олишда таъсирли чора-тадбирлар амалга оширилаётганлиги ва кўплаб соҳаларда сезиларли ўзгаришлар амалга оширилаётганлиги таъкидлаб ўтилди.

Энди суд қарорини бажармаган ҳоким жарима тўлайди. Такроран ижро қилинмаса оширилган жарима қўлланади

Оддий одамлар ва тадбиркорлар манфаатлари ҳокимликлар (исталган бошқарув органи бўлиши мумкин) билан кесишганда, бу масала энди тўлиқ маъмурий судларда кўрилади.

Маъмурий суд ҳокимиятни зиёнига ҳал қилув қарори чиқарса ва уни ижроси кечикса, ҳоким ёки ташкилот раҳбарига жарима қўлланилади. Шунда ҳам суд қарори ижроси пайсалга солинса, мутасадди давлатга янаям кўпроқ тўлаб қўйишига тўғри келади.

Бу тартибни жорий қилиш Президент томонидан яқинда имзолаган қарорда белгиланган. Ҳужжатда аввало, фуқаролар ва тадбиркорлик субъектлари ҳуқуқларининг самарали ҳимоя этилишини таъминлашга эътибор қаратилган. Бу вазифа давлат органлари билан муносабатларда амалга оширилиши учун зарур чора-тадбирлар белгиланган.

Ушбу ҳужжат моҳиятини тўла тушуниш учун унда қайд этилган атама ва терминларнинг мазмунини тушуниб олиш зарур. Жумладан, қарорда 8 та ўринда “оммавий-ҳуқуқий муносабат” жумласи қўлланилган.

Илмий адабиётларда оммавий-ҳуқуқий муносабатларнинг асосий хусусияти сифатида унда иштирок этувчи томонларнинг бири давлат ҳокимияти субъекти бўлиши айтилади. Демак, фуқаро ёки тадбиркорнинг ҳуқуқлари ҳокимият ваколатига эга бўлган субъектлар томонидан бузилишга йўл қўйилмаслиги керак.

Қарорда бу вазифани маъмурий судлар бажариши кераклиги белгиланган.

Оммавий-ҳуқуқий низоларнинг ўзига хос хусусияти шундаки, ушбу низоли муносабат иштирокчилари ҳуқуқий жиҳатдан тенг эмас. Шу жиҳатдан, қарор билан оммавий ҳуқуқий низоларни ҳал этишнинг махсус тартиби жорий этиш масаласига ҳам алоҳида эътибор қаратилган.

Яъни, ҳозирда фуқаролик ишлари бўйича ҳамда иқтисодий судлар томонидан кўрилаётган оммавий-ҳуқуқий муносабатлардан келиб чиқадиган барча ишларни маъмурий судлар тааллуқлилигига ўтказиш кўзда тутилган.

Энди маъмурий судларнинг оммавий-ҳуқуқий муносабатлардан келиб чиқадиган ишлар бўйича ҳал қилув қарорлари давлат органлари ёки ташкилотлари томонидан ижро қилинмаган тақдирда, уларнинг мансабдор шахсларига нисбатан суд жарималарини қўллаш тартиби жорий қилинади.

Хўш, бу нима дегани? Аксарият ҳолларда давлат идоралари томонидан фуқаро ёки тадбиркорлик субъектининг ҳуқуқлари бузилади. Албатта, даъво асосида бу ҳолатга суд томонидан ҳуқуқий баҳо берилиб, ҳокимият ваколатига эга бўлган субъектга муайян вазифа юклатилади. Бироқ айрим ҳолларда турли сабабларга кўра суд ҳужжати ижро этилмайди. Бундан фуқаро ёки тадбиркор азият чекмаслиги керак. Оммавий-ҳуқуқий муносабатлар бўйича суд қарорлари ижро этилмадими, у қайси идора раҳбари бўлишидан қатъий назар суд жарима қўллайди.

Албатта, қарорда инсон қадрини улуғлашга қаратилган бу каби яна бир қатор ўзгаришлар белгиланган. Мисол учун, суд остонасига ариза ёки шикоят билан борган инсон энди сарсон бўлмайди. Негаки, судлар томонидан даъво аризаси, ариза ҳамда шикоятни судга тааллуқли бўлмаганлиги сабабли қабул қилишни рад этиш ёки иш бўйича иш юритишни тугатиш тақиқланяпти. Бунда даъво аризаси, ариза, шикоят ёки иш уларни кўриб чиқишга ваколатли судга ўтказилади.

Қайд этилганларни амалда рўёбга чиқариш учун, “Ўзбекистон Республикасининг Маъмурий суд ишларини юритиш тўғрисидаги кодексига ўзгартиш ва қўшимчалар киритиш ҳақида”ги қонун лойиҳаси ишлаб чиқилади.

Бекзод ИБРАГИМОВ,
Самарқанд туманлараро маъмурий суди судьяси.

АҲОЛИНИНГ СУДЛАРГА БЎЛГАН ИШОНЧИНИ ЯНАДА ОШИРИШ УЧУН

Марказий ҳарбий округ мажлислар залида Самарқанд вилояти маъмурий суди ва Самарқанд ҳарбий суди билан ҳамкорликда навбатдаги давра-суҳбати бўлиб ўтди. Унда Янги Ўзбекистон тараққиёт стратегияси ҳамда “Давлат органлари билан муносабатларда фуқаролар ва тадбиркорлик субъектлари ҳуқуқларининг самарали ҳимоя этилишини таъминлаш ҳамда аҳолининг судларга бўлган ишончини янада ошириш чора-тадбирлари тўғрисида”ги Президент қарори мазмун-моҳияти кенг тушунтирилди.
Самарқанд вилояти маъмурий судининг судьялари А.Алимов ва С.Солиев, ҳарбий суд раиси Б.Бабакуловлар таъкидланганидек, қарорга мувофиқ, давлат органлари қарорлари устидан берилган шикоятларни кўриб чиқишда маъмурий судларнинг ролини кучайтириш мақсадида қуйидаги тартиблар жорий этилади. Маъмурий судларга далилларни йиғиш мажбурияти юкланади, ҳуқуқи бузилганларга эса далилларни йиғишда фақат ўз имкониятидан фойдаланиш шароити яратилади.

Самарқанд вилояти Ўрмон хўжалиги бошқармасида судьялар иштирокида давра суҳбати бўлиб ўтди.

Жорий йилнинг 28 январь куни Самарқанд вилоят жиноят ишлари бўйича судлов ҳайъатининг судьяси М.Тўхтаев ва Самарқанд вилоят маъмурий судининг судьяси С.Ю.Солиев томонидан Самарқанд вилояти Ўрмон хўжалиги бошқармасида “Ўрмон фонди ерларидан фойдаланиш қоидаларини бузганлик учун жавобгарлик” “Коррупцияга оид ҳуқуқбузарликларни барвақт олдини олиш” мавзусида соҳа ходимлари ўртасида ўтказилган давра суҳбати ўтказилди.

Тайлоқ туман халқ қабулхонасида фуқаролар учун сайёр қабул ўтказилди.

Жорий йилнинг 27 январь куни Самарқанд вилоят судининг раиси О.Хайитов ҳамда вилоят маьмурий судининг раиси Т.Файзиевлар томонидан Тайлок тумани фуқаролари учун Тайлок туман халқ қабулхонаси биносида сайёр қабул ўтказилди.

Вилоят маъмурий судининг раиси 2021 йил 1 декабрь куни вилоят ҳалқ қабулхонасида сайёр қабул ўтказди

Вилоят маъмурий судининг раиси Т.Файзиев 2021 йил 1 декабрь куни ҳалқ қабулхонасида сайёр қабул ўтказди. Сайёр қабулда фуқароларнинг мурожаатларига ҳуқуқий тушунтиришлар берилди

“Зўравонликка қарши биргаликда курашамиз” шиори остида 16 кунлик қўшма кампаниянинг бошланишига бағишланган тадбир бўлиб ўтди

Маълумки, Ўзбекистонда «Гендер асосидаги зўравонликка қарши 16 кунлик фаол ҳаракатлар» қўшма кампания иш бошлаган. 22 ноябрь куни “Зўравонликка қарши биргаликда курашамиз” шиори остида 16 кунлик қўшма кампаниянинг бошланишига бағишланган тадбир бўлиб ўтди.
Бутун мамлакат бўйлаб ўтказилаётган ушбу кампания доирасида аёлларнинг ҳуқуқлари ва манфаатларини ҳимоя қилиш, уларга нисбатан зўравонлик ҳолатларининг олдини олиш, хотин-қизларни жамиятдаги мавқеини оширишга қаратилган тадбирлар ўтказилаяпти. Уларда аҳолининг барча қатламлари фаол иштирок этмоқда. Самарқанд вилоят маъмурий суди ва Самарқанд туманлараро маъмурий суди судьялари Самарқанд шаҳридаги Самарқанд юридик техникуми ўқитувчилари ва талабалари билан ана шу мавзуда давра суҳбати ўтказдилар.
Биргина жорий йилда Ўзбекистонда оиладаги зўравонликнинг олдини олиш тизимини такомиллаштириш бўйича 8 та норматив-ҳуқуқий ҳужжат қабул қилинган. Соғлиқни сақлаш вазирлиги, Олий ва ўрта махсус таълим вазирлиги томонидан “Тазйиқ ва зўравонликдан жабрланувчиларга тиббий руҳий ёрдам кўрсатиш бўйича” ўқув қўлланмаси яратилди. “Аёллар дафтари”га киритилган хотин-қизларнинг ҳуқуқлари ва қонуний манфаатлари бузилганлиги тўғрисида мурожаат қилган 74 мингдан ортиқ хотин-қизларга соҳанинг етук мутахассислари томонидан ҳуқуқий ёрдам кўрсатилди. “Аёллар дафтари”даги тазйиқ ва зўравонликдан жабрланган, ижтимоий муаммолари мавжуд 71 мингдан зиёд хотин-қизларга малакали психологлар томонидан психологик ёрдам кўрсатилган. Бу факт ва далиллар давра суҳбатида судьялар томонидан маълум қилинди.
Шунингдек, давра суҳбатида судьялар Коррупцияга қарши курашиш мавзусида ҳам маъруза қилиб, коррупция мамлакатнинг ҳар жабҳасини емирадиган ўта салбий иллат эканлиги, унинг олдини олиш ва унга қарши курашишга ҳар биримиз масъул эканлигини таъкидлади.
Давра суҳбати савол-жавоблар, фикр-мулоҳазаларга бой бўлиб, қизиқарли ўтди.

Вилоят суди раиси ҳамда вилоят маъмурий суди биргаликда Самарқанд шаҳрида фуқаролар учун сайёр қабул ўтказишди

2021 йил 25 ноябрь куни Самарқанд вилоят суди раиси ҳамда вилоят маъмурий суди биргаликда Самарқанд шаҳрида фуқаролар учун сайёр қабул ўтказишди. Сайёр қабулда фуқароларнинг мурожаатлари тингланиб уларни қийнаб келаётган муаммолар юзасидан ҳуқуқий тушунтиришлар берилди.

Уч авлод урашуви

Устоз шогирдлик анъанаси касбга фидоийларни, ҳақиқий профессионал кадрларни тайёрлаш мактабидир. Самарқанд вилоят судида уч авлод учрашуви ташкил этилди. Тадбирда пенсиядаги фахрийлар, бугунги кунда фаолият кўрсатаётган судьялар ва ёш авлод бўлмиш суд ходимлари иштирок этди.
Тадбир хушхабар билан бошланди. Вилоятимизда яна тўртта пенсия ёшидаги судья ва суд ходимларига “Ўзбекистон суд фахрийси” гувоҳномаси тақдим этилди.
Шу муносабат билан мазкур уч авлод учрашувида гувоҳномалар ўз соҳибларига шогирдлар иштирокида тантанали равишда топширилди.
Вилоят суди раиси О. Ҳайитов тадбирни кириш сўзи билан очиб, устозларни юксак эътироф билан табриклади. Уларнинг шарафли меҳнат фаолияти ҳақида сўз юритиб, бугунги кунда ҳам шогирдларга йўл-йўриқ кўрсатиб катта кўмак беришаётганларини таъкидлади.
Шундан сўнг, бугун пенсияда кексалик гаштини сураётган Гулнора Баҳриева ва Шоиста Жалилова ҳамда вилоят суди судьяси Муҳиддин Тўхтаев, фуқаролик ишлари бўйича Самарқанд шаҳар суди раиси Тўлқин Усмоновга Ўзбекистон суд тизими фахрийлар марказининг “Ўзбекистон суд фахрийси” гувоҳномаси, шунингдек китоблар жамланмаси ва гуллар тантанали равишда топширилди.- 1976 йилда ўқишни тугатиб, Самарқанд туман судига ишга келганман. Шу билан роппа роса қирқ йил узлуксиз ишлаб, 2016 йилда ёруғ юз билан пенсияга чиқдим, – деди суд фахрийси Шоиста Жалилова. – Биз ишлаган даврларда ҳозиргидек шароитлар бўлмаган. Бино эски, зах, қишда совуқ бўларди. Жиҳозлар ҳам, шароитлар ҳам ҳаминқадар эди. Лекин биз касбимизни севганимиздан ҳеч қачон нолимаганмиз, садоқат билан, фидойилик билан ишлаганмиз. Чунки суд шундай нуфузли орган, унга содиқ бўлиш керак, лойиқ бўлиш керак. Бугунги бу шарт-шароитларни, судьяларга бўлган эътиборни қадрига етиб, ҳар қанча фидокорлик билан, садоқат билан ишласангизлар арзийди. Биз кексаларга берилган эътибор учун Президентимизга, Олий суд ва Судьялар олий кенгашига ҳамда вилоят суди раҳбариятига чексиз миннатдорчилик билдирамиз.
Тадбирда вилоят суди Фахрийлар кенгаши раиси И. Саидов, вилоят суди судьялари сўзга чиқиб фахрийларни қутладилар. Ёш ходимларга насиҳат қилиб, омадлар тилади. Бугун юртимизда мазкур соҳада рўёбга чиқарилаётган ўзгаришларнинг моҳияти ва аҳамияти ҳақида алоҳида тўхталиб ўтдилар.
Тадбир жуда самимий ва кўтаринки руҳда ўтди. Ёш авлод вакиллари устозлар йўлидан бориб, шундай улуғ эътирофга лойиқ бўлишни ният қилишди.